gepad.ge

ხელისუფლების მოქმედების ტაქტიკაში შედიოდა უამრავი ცრუ სატელეფონო შეტყობინების გამოგზავნა ცხელ ხაზზე, რომელთა გადამოწმებას დიდი დრო და ენერგია მიჰქონდა და ხშირად გადამოწმების შემდეგ ჩვენი მონიტორინგის ჯგუფები ასკვნიდნენ, რომ ეს იყო ცრუ ინფორმაციები.

როგორც ირკვევა, ხელისუფლებამ შექმნა დამრბევთა არაოფიციალური ჯგუფები (ე. წ. ზონდერ-ბრიგადები), რომლებიც ფიზიკურად უსწორდებოდნენ ოპოზიციის აქტივისტებს და მშვიდობიან მომიტინგეებს. აღნიშნულ დამრბევ ჯგუფებში მონაწილეობდნენ როგორც სამოქალაქო ფორმაში ჩაცმული ძალოვანი უწყებების წარმომადგენლები, ასევე ნაციონალური მოძრაობის აქტივისტებიც. სწორედ ეს ჯგუფები ახორციელებდნენ ზემოთ აღწერილ თავდასხმებს.

გარკვეულმა სახელმწიფო სტრუქტურებმა საპროტესტო აქციების დღეებში უარი განაცხადეს თავისი პირდაპირი მოვალეობის შესრულებაზე. ეს განსაკუთრებით მკაფიოდ გამოვლინდა პატრულისა და მერიის დასუფთავების სამსახურის მუშაობის მაგალითზე. გამოძახების დროს ადგილზე არ მიდიოდნენ ამ სამსახურების წარმომადგენლები. უფრო მეტიც, შსს-ს ხელმძღვანელებმა ოფიციალურად განაცხადეს, რომ საპროტესტო აქციების კერებს ამ სამსახურების წარმომადგენლები ახლოს არ გაეკარებიან თითქოს იმიტომ, რომ თავიდან აიცილონ სამართალდამცველებისა და მომიტინგეების უშუალო შეხების საფრთხე. შსს-ს ხელმძღვანელობის ამ უკანონო ბრძანებას ზედმიწევნით ასრულებდნენ ამ სამინისტროს ქვედა რგოლების წარმომადგენლები.

აპრილის თვეში და შემდგომ პერიოდში დაკავებული მომიტინგეების მიმდინარე სასამართლო პროცესები